Il racconto del collega Moreno Jakomin, scritto a maggio 2024, ci conduce in un viaggio lungo la linea 64. Il percorso parte dal mare e si snoda fino ai confini italiani, offrendo uno spaccato della città e dei suoi dintorni.
"La 64 xe una linea belissima. No come la 6, perché la 6 stà sai vizin al mar e la 64 pena pena, ma dal mar la parti. E lo fa con un grandissimo valor simbolico, visto che la parti dal mar e la atraversa l’intiero teritorio italian fin al confin: xe una linea che atraversa, leteralmente, un stato. Ghe xe una sua poesia in questo.
El mar, in verità, se lo vedi de vizin pena pena, perché el capolinea xe in piaza Tommaseo e da là el xe un fia sconto dale piante che xe de l’altra parte dela strada. Ma el ghe xe, se lo senti, se lo intravedi. E se se lo lassa indrio pena partidi, che la 64 la se porta nela vivacità de corso Italia, per dopo girar in via S. Spiridione e là incrosar la bela e pedonale via San Nicolò. In quel punto, come più avanti in Ponterosso, xe bel oservar i pedoni, esemplari diversi de una umanità che unissi, anche se a volte vien de domandarse cossa pol gaver in comune una vecia babaza triestina un poco ranzida e dal aspeto zigalon che atraversa la strada per andar de Mirella con un qualsiasi turista giaponese, dale maniere delicate e l’anda rispetosa, che nol atraversa nianche la strada, per esser sicuro de no intralcialciar el servizio de trasporto publico urbano.
Passà Ponterosso vien via Filzi, popolada, verso la sua fine, da una fauna de giovini aspiranti poligloti dela scola interpreti. E la 64 va su, afiancandose per un tochetin ale sine de un tram oramai imaginario. E su, per via Commerciale, coi sui giardini dele vilete austroungariche, che in primavera impinissi l’aria col odor dei fiori. E su, a superar Cologna, dove tanta muleria fa e ga fato sport. E su, Strada Nova per Opicina, col verde del Carso de una parte e la vista de Trieste e del golfo de l’altra. Ogni volta veder sto panorama xe una emozion: el mar xe una distesa fata de anima e se xe vero che esserghe vizin, o dentro, xe sempre un momento magico, xe anche vero che vederlo dal alto xe come se dessi una misura ala imensità. Le cità de mar xe bele, ma cossa saria de lore senza qualche colina da cui vardarle dal alto?
L’Obelisco segna un punto de svolta: via la vista del mar, se entra nel altopian, de novo con le sine del tram vizin. Forsi un giorno ghe sarà anche el tram… Sognar xe bel. E xe questo che rendi belissima la 64: i sogni. Perché passada lungofora la citadina de Opicina, dove fin poco tempo fa la se girava, come paurosa de ciapar quela lunga strada drita che andava verso un orizonte ondulà verso el sorger del sol, adesso quela lunga strada drita la 64 la la ciapa, quasi senza paura. El monte Nanos davanti, altro mondo drio de lui, xe la strada che porta a Vienna, a Budapest, in Europa, ma anche, se un ga tempo e fantasia, in Siberia e, perché no, a Sežana. Chi de noi no ga mai fato quela strada per partir per qualche viagio, portandose drio aspetative, voia de scampar, de cambiar, de romper qualche schema, magari anche solo per qualche giorno? Eco, questo fa riviver la 64 mentre la se avicina al confin, piena de speranze. Sognar xe bel. Finché no se riva al confin e de colpo la coriera gira, quasi traumaticamente, come una persona che stava gustandose la partenza verso un novo mondo, una nova vita, una nova realtà e inveze sul più bel no ga più el coragio de cambiar. I impegni, le responsabilità, forsi el fato che la realtà no xe cussì bruta da abandonarla, questo non lo so, per ognidun xe diverso, epur xe sempre uguale: una inversion a U ala prima, o, come nel caso dela 64, ala ultima ocasion.
E alora indrio, coi rimpianti per quel che no xe stà. Epur tornar indrio per quela strada riva anche esser bel: l’aria de casa che se avicina, el saver che se sta andando incontro a un posto dove el sol tramonta sul mar, el verde intorno che meti pase, perfin un per de muche che pascola magnando erba in un teren vizin la strada. Xe bei animai le muche. A dir el vero tuti i animai xe bei, forsi fora che qualche tipologia de cagneto satanico a cui adesso preferisso no pensar. Ma le muche xe particolarmente bele, con quela anda tranquila, dolce, materna. De picio iero particolarmente bravo a disegnarle. Circa. Disemo che no le vegniva fora particolarmente realistiche (de sicuro no iero bon de render l’anda materna), però le iera espressive: le gaveva quela aria meravigliada che xe un poco come me piaseva, e come me piasi, vardar el mondo.
Me ricordo, anche perché iera poco tempo fa, che tornavo de Budapest col Flixbus e, passada Opicina e girada la curva del Obelisco, me son trovà davanti al tramonto sul mar. Ore de Pianura Panonica, un poca de Slovenia un pochetin più bela in quanto vagamente alpina, e bum, de colpo sto tramonto sul golfo. La 64 me ga fato riviver quel momento, ma penso che xe un momento che, magari no rivando de Budapest, magari rivando giusto de Postumia o anche de solo de Opicina, gaveré vissù tuti voi.
E zo, per via Commerciale, con quei scorci de mar e de Trieste che non se pol nianche descriver, perché le parole se ferma dove la beleza no ga limiti. A quel punto, quando se ga sognà, se ga girà le spale ai propri sogni, ma se ga visto comunque la beleza e l’emozion che questa pol crear, le machine postegiade mal in via Rittmeyer no xe nianche un fastidio, basta un poco de senso dela misura. Che, forsi, xe proprio quel che ne fa tornar indrio quando rivemo a Fernetti, quela inversion a U verso la vita reale.
Ma forsi un giorno qualchedun riverà con la 64 a Postumia.
Sognar xe bel."
